హైదరాబాద్ నగరంలో గణేశ్ నిమజ్జన వేడుకలు ఉత్సాహంగా సాగుతున్నాయి. ప్రఖ్యాత ఖైరతాబాద్ మహాగణపతి నిమజ్జనం శుక్రవారం జరగనుంది. దీనికోసం జీహెచ్ఎంసీ, పోలీసు శాఖ భారీ ఏర్పాట్లు చేశాయి.
నగరవ్యాప్తంగా ప్రత్యేక నిమజ్జన ఘాట్లు, కృత్రిమ కొలనులు ఏర్పాటు చేశారు. ప్రతి ప్రదేశంలో డీఆర్ఎఫ్ రెస్క్యూ బృందాలు, గజ ఈతగాళ్లు, అత్యవసర వైద్య సేవలను అందుబాటులో ఉంచారు. భారీ విగ్రహాల నిమజ్జనానికి క్రేన్లను వినియోగిస్తున్నారు.
ట్యాంక్‌బండ్, ఎన్టీఆర్ మార్గ్, నెక్లెస్ రోడ్ పరిసరాల్లో ట్రాఫిక్ ఆంక్షలు విధించారు. భక్తులు ప్రజా రవాణాను ఉపయోగించాలని, నిమజ్జన సమయంలో పిల్లలను నీటి దగ్గరకు పంపవద్దని పోలీసులు సూచించారు.
