గణేశ్ ఉత్సవాలు ముగిసిన వెంటనే హైదరాబాద్ నగరం చెత్త కుప్పలతో నిండిపోయింది. పండుగ రోజుల్లో జీహెచ్ఎంసీ పారిశుద్ధ్య సిబ్బందిలో 80 శాతానికి పైగా విధులకు హాజరు కాకపోవడంతో ప్రధాన రహదారులు, కాలనీల్లో టన్నుల కొద్దీ వ్యర్థాలు పేరుకుపోయాయి.
నిమజ్జనం పూర్తయ్యాక జీహెచ్ఎంసీ యుద్ధప్రాతిపదికన శుభ్రత కార్యక్రమాన్ని చేపట్టింది. అదనపు వాహనాలు, సిబ్బందిని రంగంలోకి దించి ట్యాంక్‌బండ్ పరిసరాలు, నిమజ్జన మార్గాలను శుభ్రం చేస్తున్నారు.
వర్షాకాలంలో చెత్త నిల్వ ఉంటే దోమలు, వ్యాధులు వ్యాపిస్తాయని ప్రజలు ఆందోళన వ్యక్తం చేస్తున్నారు. సిబ్బంది గైర్హాజరుపై విచారణ జరపాలని కాలనీ సంఘాలు డిమాండ్ చేశాయి.
